Namibia Tagebuch

Do ich do derfür is Internetcafi gang wirds nöd jede Tag e neue ge, aber ich hoffe doch dassi so regelmässig wie nur möglich chan eu mit interessante Gschichte fuettere…
Die Wuche hends do no Ferie deshalb hets no ke Chind do die ich mit Spieli beschäftige chan. Jedoch am Fritignomitag sind e paar cho und hend mit mir gspielt. Ich hans sehr schön gfunde und freu mi scho riesig uf di nöchst Wuche wen d Ferie verbi sind;-) Ansonste bin ich sehr härzlich empfange worde und läb mich so langsam i. Trotzdem dasses in Namibia jetzt Winte isch isches viel fründlichers Wätter als bi üs, macht scho viel us wenn d Sunne jede Tag tuet schine;-) Für mich gseht Tsumeb me wienes Labirinth us;-) Bin deshalb mega stolz uf mich dassis hüt vom Lis bis id Location gschafft han zum Gäld hole;-) da isch vor allem e Leistig für mich weme weiss wa für en schreckliche Orientierigssinn ich han…Hüt bini mir fast vor cho wie e Informatikerin, hans gschafft es paar Computerproblem vor Selma, de Sekretärin vom Lis z löse;-)
Ja hm, was hani sust no erläbt bis hüt? Jo genau, de ersti Action hani scho ir Schwiz bir Handgepäckkontrolle ka, han doch nid gwüsst dass me de Laptop muss zeige, de isch zunterst ir Täsche gsi… Han müsse di ganz Täsche läre und natürlich isch si so voll gsi dassi nocher mini lieb müeh ka han zum si wieder zpacke. Ir münd wüsse packe isch nid grad mini Stärcki und Dehei het si mir de Papi packt… Nach dere ganze Aktion bini ganz nass gschwitzt gsi;-)
Sust isch aber alles guet gange, muss sogar nomol stolz uf mi si weli am Flughafe z Windhoek zwei Inder han chöne erkläre wie me z Zollformular usfüllt;-) Ich wo so angst ka han vor dem Formular bin drus cho;-)
Ja, dänke das wärs fürs erste mol gsi, werd eu den nöchst Wuche brichte wies isch mit de Kids und de Spieli;-) bin sälber sehr gspannt. Also hoffe ir Schwiz isch alles i.o.
Hüt Samstig het en Workshop agfange für d Lehrer vo de 3 APC isch also öpis los gsi. Han müsse für 20 Lüt z Ässe parat mache;-) aber isch eifach gsi, het Penne geh, Würst wome chan im Wasser süde und e eifachi Sauce. Ihr münd wüsse, die machend do d Sauce us Päcklisuppe;-) am Nomitag hani mit de Lulu, em Jason und em Elifas ( hoffe ich hans richtig gschrieben) Yazzy und Memory gspielt. Ich hans gnosse! De Elifas isch 12 aber für mich gsiet er us wie 8 und er isch bis öbe am 10 bliebe, isch mega härzig gsi er het mir immer ghulfe, en richtige Schatz aber Muusarm…. Das sind vieli do, aber trotzdem schinened si nüt vo irer Fröhlichkeit izbüesse! Ach ja, de Father Hans isch do (er isch fürs finanziele zueständig vom APC) wägäm Workshop, ds Lis und er chömed mer vor wie Chatz und Muus;-) Hüt simer no go Gschier poste damit mer gnueg hend während em Workshop. Chönd ir eu vorstelle dass me do Täller für umgrächnet ein Franke kriegt? Ds Lis het mir erklärt dass die ds Gschierr krieged wo Europa nid will mit chline Fähler, aber ich muss echt sägä isch wunderschöns Gschierr! Nur z Problem, vieli sind so arm, die hend nid emol gnueg Gäld für das billige Gschierr…
Ir hend sicher gmerkt isch alles chli durenand wasi do schriebe. Das isch well i das Dihei bim Lis uf mim Laptop schriebe und ufe Cd speichere. Do ich no nid han chöne is Internetcafi go tueni mini Erlebnis jede Tag erneuere. Hoffe das isch nid all zu schlimm für eu…
So im Moment fallt mer grad nüt me i deshalb beend ich für hüt mine Bricht;-)
Hüt hani 10 Kilo Härtöpfel gschellt und gschnitte, chönd ir eu das vorstelle? Drzue hets en Brei ge – nei ken Haferbrei, Brei heisst uf Afrikaans so öpis wie grilliere. Die Lüt do lueged ebe es Ässe erst als richtig a wenns au Fleisch derzue git. Nur no morn Mittag, den müend mer nüm ganz so viel verchöstige. Für so e churzi Zyt isch es okay aber wenn mer für länger soviel Mäge müssted zfriede stelle würdi das für mich z stressig. Ansonste hani hüt nid viel me gmacht, Härdöpfel grüstet und abgwäscht. Han e gueti Assistenz ka de Elifas, wie scho gester het er au hüt de ganz Tag ghulfe. Also dänke für hüt end ich do drmit;-)
so endlich hanis gschafft;-) hoffe dassi mindestens jede 2. Tag chan is Internetcafi und eu en neue Bitrag lifere! So huet sind die vo Oshikuku und Omagalanga (hoffe das isch richtig) wieder Hei gange. Zum Glueck got au der Father Hans huet wieder, i glaub viel laenger wuerd ich der noed ertraege;-) Huet nomitag chani den endlich mit worschinlich es paar meh Kids spiele freu mi scho riesig druf;-) also ier liebe der noechst Bitrag folgt;-)

So hüt isches endlich sowit, ich flüge uf Namibia. Irgendwie es komischs Gfühl eifach für 3 Mönet alles hinter mir zlo, mini Familie, Fründe, min Schatz... Ich freu mich aber au druf, ich bin überzügt dass das e gueti Erfahrig si wird. Vorallem wird mol guet tue 3 Mönet ohni Luxus zsie und ds gseh dass me do in der guete Schwiz absolut ke Grund het sich z beklage. So no es Abschiedsföteli und den werded ir ds nöchst mol mine Bricht läse wo ich den ds Namibia schriebe. Ich denke ich werd eu viel ds brichte ha. Also macheds guet und bis in 3 Mönet.

Ir wüssed sicher alli dasi am Mäntig 8.Mai uf Namibia flüge, um dört neui Erfahrige z mache.

Für die wo das nonid wüssed, i gang zu minere Tante Lis, wo döt es Entwickligsprojekt leitet. Sie het 3 Schuele, wome in Musik, Kunst und Tanz unterichtet wird. Die Kids wo zu ire gönd sind sehr arm und vielfach au Strossechinder.
Mini Ufgab wird unteranderem si mich mit dene voralem jüngere Chind z beschäftige wo sich im APC (so heisst die Schuel(ArtsPerformanceCenter)) ufhaltend aber ke untericht hend. Mir werded Spieli mache, Ball spiele, Flügerli bastle usw. aber nöchers werdi eu schriebe weni dört bin und gsehn was sie gern machend.

Ich würd die wos interessiert gern chli ufem Laufende halte, drum werd ich Tagebuech schriebe , wo ir chönd do läse wener wend. Ich hoffe natürlich dassi au chli über d Gschehniss ir Schwiz informiert wird, ir mich über eu ufem Laufende haltend. Freu mich über jedes Mail, jede Komentar und werd luege dassi au immer antworte.

So das wärs fürs erste mol gsi;-)